Falgun 14, Traffic Update

सल्यानको सिद्धकुमार गाउँपालिका १ चतारे स्थित पतारे खोलामा आज मोटरसाइकल पल्टिदा चालकको मृत्यु भएको छ । मृत्यु हुनेमा सिद्धकुमार गाउँपालिका १ कै धानेटाकुराका २९ वर्षीय रमेश बुढाथोकी रहेका छन् । बुढाथोकीको घटनास्थलमै मृत्यु भएको जिल्ला प्रहरी कार्यालय सल्यानले जनाएको छ । आज बिहान ७ बजे मोखलाबाट चतारेतर्फ जाँदै गरेको रा ३ प ८८८८ नम्बरको मोटरसाइकल नियन्त्रण गुमाएर सडकबाट करिब १५ मीटर तल खोलामा खसेको थियो । 

बाराको जितपुरसिमरा उपमहानगरपालिका १ मा आज भ्यानको ठक्करबाट मोटरसाइकल चालक घाइते भएका छन् । सिमराबाट पथलैयातर्फ जाँदै गरेको ना १ ज ८४५५ नम्बरको मारुती भ्यानले विपरित दिशाबाट आउँदै गरेको ना ४३ प ७३९८ नम्बरको मोटरसाइकललाई ठक्कर दिएको थियो । दुर्घटनामा घाइते भएका मोटरसाइकल चालक सोही ठाउँका ४० वर्षीय राम श्रेष्ठलाई उपचारको लागि विरगञ्ज स्थित न्यूरो अस्पताल पठाइएको छ । ठक्कर दिने भ्यान सहित चालकलाई बारा प्रहरीले नियन्त्रणमा लिइसकेको छ ।