Kartik 28,Traffic Update


सल्यानको त्रिवेणी गाउँपालिका ४ बडागाउँमा आज जिप दुर्घटना हुँदा २ जनाको मृत्यु भएको छ भने ७ जना घाइते भएका छन् । मृत्यु हुनेमा जिपमा सवार त्रिवेणी गाउँपालिका ४ फालाबाङ बस्ने ६० बर्षीया कृष्णादेवी परियार र ५९ बर्षीया यज्ञी थापा रहेका छन् । दुर्घटनामा परी घाइते भएका उनीहरुको उपचारका क्रममा अञ्चल अस्पताल तुल्सीपुर दाङमा मृत्यु भएको हो । दुर्घटनामा परी घाइते भएका जिप चालक सहित ७ जनाको सोही अस्पतालमा उपचार भैरहेको छ । आज बिहान साढे १० बजे सल्यानकै फालाबाङबाट दाङ तर्फ जादै गरेको रा १ ज ४३२ नम्बरको जिप आफै अनियन्त्रित भई दुर्घटना भएको इलाका प्रहरी कार्यालय लुहामले जनाएको छ । 

प्युठानको स्वर्गद्वारी नगरपालिका ४ मनखोलामा आज बोलेरो जीप दुर्घटना हुँदा मृत्यु भएकी महिलाको शनाखत भएको छ । मृत्यु हुनेमा स्वर्गद्वारी नगरपालिका २  खाल बस्ने ४० वर्षीया नगरी सुनार रहेकी छिन् । चालक सहित ३ जना भने गम्भीर घाइते भएका छन्  । घाइते तीनै जनालाई उपचारको लागि भैरहवा स्थित युनिभर्सल कलेज अफ मेडिकल साइन्स अस्पताल पठाइएको छ । आज बिहान पौने ९ बजे भिंग्रीबाट चालक सहित ५ जना सवार रही स्वर्गद्धारी मन्दिरतर्फ जाँदै गरेको ग २ च ५२४९ नम्बरको जीप सडकबाट करिब ३ सय मीटर तल खसेको थियो ।