चितवनको ईच्छाकामना गाउँपालिका ४ चुमखोला स्थित त्रिशुली नदिमा ३ जना सवार मोटरसाइकल खस्दा १ युवतीको मृत्यु भएको २ जना बेपत्ता भएका छन् । मुग्लिनबाट काठमाण्डौ तर्फ आउँदै गरेको नम्बर नखुलेको मोटरसाइकल आज बिहान साढे १० बजे अनियन्त्रित भइ त्रिशुली नदीमा खसेको हो । दुर्घटना लगत्तै उद्धारको लागि खटिएको प्रहरीले अन्दाजी ३५ वर्षीया युवतीको शव फेला पारेको हो । बेपत्ता २ जनाको खोजी गर्नुको साथै घटनाको सम्बन्धमा थप विवरण आउन बाँकी रहेको इलाका प्रहरी कार्यालय मुग्लिनले जनाएको छ । बाँकेको नेपालगंज उपमहानगरपालिका २२ पुरैनामा आज बिहान ट्याक्टरको ठक्करबाट साईकलमा सवार २ बालक घाईते भएका छन् । ईन्द्रपुरदेखी कम्दी तर्फ जाँदै गरेको भे १ त ६२२ नम्बरको ट्याक्टरले बिपरित दिशाबाट आँउदै गरेको साईकललाई आज बिहान साढे ७ बजे ठक्कर दिएको थियो । घाईते भएका साईकल चालक नेपालगंज उपमहानगरपालिका १९ का अन्दाजी ११ बर्षीय जुबेर अली र पछाडी सवार उनका ९ बर्षिय भाई ईब्रान अली नाउलाई उपचारको लागि नर्सिङहोम नेपालगंज बाँके पठाइएको छ । घाईते मध्ये ईब्रानको अवस्था बने गम्भीर रहेको छ । ट्याक्टर चालकलाई जिल्ला प्रहरी कार्यालय बाँकेले नियन्त्रणमा लिएको छ ।
काठमाडौंको कलंकीमा आज ट्रकको ठक्करबाट स्कुटरमा सवार एक महिलाको मृत्यु भएको छ । स्कुटर चालक युवती घाइते भएकी छिन् । मृत्यु हुनेमा स्कुटर पछाडी सवार काठमाडौंकै चन्द्रागिरी नगरपालिका १४ की ६५ वर्षीया सन्तुमाया राउत रहेकी छिन् । गम्भीर घाइते भएकी उनको उपचारको क्रममा महांकाल स्थित राष्ट्रीय ट्रमा सेन्टरमा मृत्यु भएको हो । सामान्य घाइते भएकी स्कुटर चालक युवतीको कलंकी स्थित शहिद मेमोरीयल अस्पतालमा उपचार भइरहेको छ । कलंकीबाट नैकापतर्फ जाँदै गरेको सुदुर पश्चिम प्रदेश ०१औ००१ ख २९४१ नम्बरको ट्रकले सोही दिशातर्फ जाँदै गरेको बागमती प्रदेश ०३-००४ प ४७०३ नम्बरको मोटरसाइकललाई आज दिउँसो पौने १ बजे ठक्कर दिएको हो । ट्रक सहित चालक नियन्त्रणमा रहेको प्रहरी वृत्त कालिमाटीले जनाएको छ । सुनसरीको धरान उपमहानगरपालिका १३ लक्ष्मी चोकमा आज मोटरसाइकलको ठक्करबाट पैदलयात्री महिला गम्भीर घाइते भएकी छिन् । घाइते भएकी नाम, थर, ठेगाना नखुलेकी अन्दाजी ६५ वर्षीया महिलाको उपचार घोपा स्थित विपि कोइराला स्वास्थ्य विज्ञान प्रतिष्ठानमा भइरहेको छ । प्रदेश १-०२-०५ प ६६७३ नम्बरको मोटरसाइकलले पैदलयात्री महिलालाई आज मध्यान्ह १२ बजे ठक्कर दिएको हो । दुर्घटनामा संलग्न मोटरसाइकल सहित चालक नियन्त्रणमा रहेको इलाका प्रहरी कार्यालय धरान सुनसरीले जनाएको छ ।
सप्तरीको रुपनी गाउँपालिका २ मा गएराती ट्रकको ठक्करबाट मोटरसाईकलमा सवार ३ जना गम्भीर घाईते भएका छन् । घाईते भएका मोटरसाईकल चालक सप्तरी शम्भुनाथ नगरपालिका ७ का अन्दाजी २२ बर्षीय प्रशान्त चौधरी र पछाडी सवार सोही स्थानका २० बर्षीय अबिनाश कुमार चौधरीलाई उपचारको लागि वि.पि कोइराला स्वास्थ्य बिज्ञान प्रतिष्ठन धरान तर्फ पठाइएको छ । घाईते भएका सोही स्थानका २३ बर्षीय सुरज चौधरीको भने युनिक अस्पताल रुपनीमै उपचार भइरहेको छ । ना ३ ख ५३३५ नम्बरको ट्रकले प्रदेश २-०१-००३ प ४३० नम्बरको मोटरसाईकललाई गएराती पौने २ बजे ठक्कर दिएको थियो । दुवै सवारी साधन र ट्रक चालकलाई ईलाका प्रहरी कार्यालय रुपनी सप्तरी नियन्त्रणमा लिएको छ ।
