कैलालीको मोहन्याल गाउँपालिका ५ तालबन्दमा हिजो बेलुकी ट्याक्टर दुर्घटना हुँदा १ जनाको मृत्यु भएको छ । २ जना घाइते भएका छन् । मृत्यु हुनेमा ट्याक्टरमा सवार कैलालीकै गौरीगंगा नगरपालिका ७ का ४५ वर्षीय चक्र जेठारा रहेका छन् । धनगढी स्थित सेती प्रादेशिक अस्पताल उपचारको क्रममा गएराती साढे १० बजे उनको मृत्यु भएको हो । घाइते भएका मोहन्याल गाउँपालिका ५ कै २० वर्षीया निर्मला रोका मगर र ४० वर्षीया गौमती वि.क.को सोही अस्पतालमा उपचार भइरहेको छ । से २ त २८५० नम्बरको ट्याक्टर हिजो बेलुकी पौने ८ बजे अनियन्त्रित भई पल्टिएको थियो । ट्याक्टर सहित चालकलाई प्रहरीले नियन्त्रणमा लिएको छ । चितवनको भरतपुर महानगरपालिका २९ चौध किलोमा हिजो बेलुकी ट्रकको ठक्करबाट कारमा सवार ५ जना घाइते भएका छन् । घाइते सबैलाई उपचारको लागि चितवन मेडिकल कलेज भरतपुर पठाइएको छ । घाइते मध्ये नवलपरासी बर्दघाट सुस्ता पुर्वको देवचुली नगरपालिका १४ का ४३ वर्षीय टेक प्रसाद न्यौपानेको अवस्था भने गम्भीर रहेको छ ।नारायणगढ-मुग्लिङ सडकखण्डमा लु १ ख ८२६६ नम्बरको कवाडी सामान बोकेको ट्रकले बा २१ च ३७१५ नम्बरको कारलाई हिजो बेलुकी ८ बजे ठक्कर दिएको थियो । दुर्घटना लगतै फरार भएका ट्रक चालकको खोजी भइरहेको प्रहरी चौकी जुगेडीले जनाएको छ ।
काठमाण्डौ उपत्यकाको गल्कोपाखा, लैनचौर, केशरमहल हुँदै चल्ने सवारी साधन क्युमा चलिरहेका छन् । यसबाहेक अन्य चोकमा भने सवारी साधन ट्राफिक व्यवस्थापनका क्रममा केही समय रोकिनुपर्ने अवस्था रहेको छ । विशेषगरी सिंहदरबार, माइतीघर, थापाथली, त्रिपुरेश्वर, कालिमाटी, सोह्रखुट्टे, नयाँबानेश्वर, कोटेश्वर, सातदोबाटो, ग्वार्को, बालाजु, नारायणगोपालचोक, मित्रपार्क र गौशाला लगायतका चोकमा सवारी साधन केही समय रोकिनु पर्ने अवस्था रहेको हो । उता माइतीघरबाट थापाथलीतर्फको सर्भिस लेनमा चल्ने सवारी साधनलाई मुख्य सडकबाट चलाईएको छ । सर्भिस लेनमा मानिसहरू बसेका कारण सवारी साधनलाई मुख्य लेनबाट चलाईएको हो । यस्तै, ग्वार्को चोकमा फ्लाई ओभर निर्माणका लागि मुख्य सडक भत्काइएका कारण ग्वार्को-सातदोबाटो सडकखण्डमा सवारी साधनलाई सर्भिस लेनबाट चलाइएको छ । कलंकी स्थित खसिबजारदेखी बल्खुसम्मको सर्भिस लेनमा पुरानो पिच भत्काउने कार्य भइरहेकाले सवारी साधनलाई मुख्य सडकबाट सञ्चालन गरिएको छ ।
सिरहाको कर्जन्हा नगरपालिका २ कमलापुलमा हिजो बेलुकी भएको सवारी दुर्घटनामा १ पुरुषको मृत्यु भएको छ । नम्बर खुल्न नसकेको सवारी साधनले बा ५७ प ७२० नम्बरको मोटरसइकललाई हिजो बेलुकी पौने ८ बजे ठक्कर दिएको थियो । मोटरसाइकल चालक कर्जन्हा २ कै बडरामालका ४२ वर्षीय ठाकुरनाथ खतिवडाको उपचारको लागि अस्पताल लैजाने क्रममा बाटोमै मृत्यु भएको हो । मोटरसाइकललाई ठक्कर दिएर सवारी साधन सहित फरार रहेका चालकको खोजी भइरहेको इलाका प्रहरी कार्यालय बन्दिपुर सिरहाले जनाएको छ ।
कैलालीको धनगढी उपमहानगरपालिका ६ ढुङ्गेबजारमा गएराति मोटरसाईकल अनियन्त्रीत भई पल्टिदा २ जना घाईते भएका छन् । गएराति सवा १ बजे धनगढीबाट स्याउले तर्फ जाँदै गरेको सुदुरपश्चिम प्रदेश ०१ ००९ प ७८९१ नम्बरको मोटरसाईकल पल्टिदा मोटरसाईकल चालक कैलालीकै गौरीगंगा नगरपालिका ८ बस्ने २८ बर्षीय सोहित चौधरी र पछाडी सवार धनगढी बस्ने १४ बर्षीय रोशन चौधरी रहेका छन् । घाईते दुवैजनाको निसर्ग अस्पताल धनगढीमा उपचार भइरहेको छ । घाइते मध्ये चालकको अवस्था मध्यम रहेको र मोटरसाईकल नियन्त्रणमा रहेको जिल्ला प्रहरी कार्यालय कैलालीले जनाएको छ ।
बाराको निजगढ नगरपालिका १३ मा हिजो बेलुकी मोटरसाइकल दुर्घटना हुँदा चालकको मृत्यु भएको छ । पछाडी सवार २ जना भने घाइते भएका छन् । मृत्यु हुनेमा निजगढ नगरपालिका १३ वेशीगाउँका १८ वर्षीय दिपक बिक रहेका छन् । दुर्घटनामा गम्भीर घाइते भएका दिपकको उपचारको क्रममा रतनपुर स्थित एम्स अस्पतालमा गएराती साढे १ बजे मृत्यु भएको हो । घाइते भएका मोटरसाइकलमा पछाडी सवार सोही ठाँउका ३० वर्षीय चन्द्र बहादुर बल र १७ वर्षीय निभराज मोक्तानको सोही अस्पतालमै उपचार भइरहेको छ । ना २३ प ६२७७ नम्बरको मोटरसाइकल हिजो बेलुकी सवा ७ बजे अनियन्त्रित भई बिजुलीको पोलमा ठोकिएको अस्थायी प्रहरी पोष्ट रतनपुर बाराले जनाएको छ । काठमाण्डौको तिलगंगामा आज बिहान भ्यानको ठक्करबाट पैदलयात्री गम्भीर घाइते भएका छन् । घाइते भएका अन्दाजी ५५ वर्षीय पुरुषको सिनामगंल स्थित काठमाण्डौ मेडिकल कलेजमा उपचार भइरहेको छ । कोटेश्वरबाट गौशालातर्फ आउँदै गरेको बा १७ च ५०६ नम्बरको दुध ढुवानी गर्ने भ्यानले आज बिहान पौने ५ बजे पैदलयात्रीलाई ठक्कर दिएको थियो । भ्यान सहित चालकलाई प्रहरी वृत्त गौशालाले नियन्त्रणमा लिएको छ ।
काठमाण्डौ उपत्यका ट्राफिक प्रहरी कार्यालयको आयोजनामा आज मोटिभेसनल फुटबल प्रतियोगिता सम्पन्नभएको छ । काठमाण्डौ उपत्यका ट्राफिक प्रहरी कार्यालयकी प्रमुख प्रहरी नायब महानिरीक्षक मीरा चौधरीले फुटबल हस्तान्तरण गरेर खेलको सुरुवात गर्नु भएको थियो । जावलाखेल युथ क्लबको खेल मैदानमा काठमाण्डौ उपत्यका ट्राफिक प्रहरी कार्यालय र त्यस मातहतका कार्यालयका बिचमा भएको फुटबल प्रतियोगिमा काठमाण्डौ उपत्यका ट्राफिक प्रहरी कार्यालयले २–१ गोल अन्तरले जित हासिल गरेको छ । काठमाण्डौ उपत्यका ट्राफिक प्रहरी कार्यालयका लागि प्रहरी वरिष्ठ नायब निरीक्षक अनुप राउतले पहिलो गोल गरेर आफ्नो टिमलाई अग्रता दिलाउनु भएको थियो भने दोस्रो प्रहरी जवान दशरथ गिरीले गर्नु भएको हो । मातहतका कार्यालयहरुको तर्फबाट भने राज कुमार चौधरीले खेलको अन्तिम समयमा आफ्नो टिमका लागि गोल गर्नु भएको थियो । स्वास्थ्यलाई पनि ध्यानमा राखि कर्मचारीहरुमा सद्भाव, उत्प्रेरणा र पुनर्ताजगी प्रदान गर्ने उदेश्यका साथ फुटबल प्रतियोगिताको आयोजना गरिएको कार्यालयका प्रवक्ता एवम् प्रहरी वरिष्ठ उपरीक्षक राजेन्द्र प्रसाद भट्टले बताउनु भएको छ । खेलमा काठमाण्डौ उपत्यका ट्राफिक प्रहरी कार्यालयको नेतृत्व प्रहरी उपरीक्षक अवदेश विष्ट क्षेत्रीले गर्नु भएको थियो भने मातहतका कार्यालयहरूको नेतृत्व ट्राफिक प्रहरी वृत्त कालीमाटीका प्रमुख प्रहरी निरीक्षक इन्द्रजित सुनारले गर्नु भएको थियो ।
